Oʻzbekiston Respublikasi Axborotlashtirish va telekommunikatsiyalar sohasida nazorat boʻyicha davlat inspeksiyasi aloqa, axborotlashtirish va telekommunikatsiya texnologiyalari, davriy bosma nashrlarni tarqatish sohasida koʻrsatilayotgan xizmatlarning sifatli taqdim etilishi va isteʼmolchilar huquqlarini himoya qilish, sohada qonun hujjatlari, normativ hujjatlar va davlat standartlari talablariga rioya qilinishi, “Elektron hukumat” tizimida infratuzilmani rivojlantirish va axborot-kommunikatsiya texnologiyalaridan samarali foydalanish, elektron davlat xizmatlarini koʻrsatish samaradorligi, telekommunikatsiya infratuzilmasini rivojlantirish boʻyicha davlat nazoratini amalga oshiruvchi vakolatli organ hisoblanadi. “Oʻzkomnazorat” Davlat inspeksiyasining bugungi kundagi faoliyati aholi va tadbirkorlarga koʻrsatilayotgan telekommunikatsiya xizmatlari sifatini yaxshilash, sohada faoliyat yuritayotgan tadbirkorlik subyektlarini qoʻllab-quvvatlash, soha rivojlanishi uchun qulay sharoitlar yaratish va sohada qonun hujjatlari, normativ hujjatlar va davlat standartlari talablariga rioya qilinishini taʼminlashga qaratilmoqda. Maʼlumki, mamlakatimizda korrupsiyaga qarshi kurashishga jiddiy eʼtibor qaratilib, ushbu illatni tag-tomiri bilan yoʻq qilishga qaratilgan tadbirlar amaliyotga tatbiq etilmoqda. Sohada davlat nazoratini amalga oshirishda zimmamizga yuklangan masʼuliyatni yaxshi anglaymiz va oʻz navbatida, “Oʻzkomnazorat” Davlat inspeksiyasida korrupsiyaga qarshi kurashish tizimini samarali amalga oshirish, korrupsion harakatlarning har qanday shakl va koʻrinishlariga nisbatan jamoada keskin murosasizlikni shakllantirish uchun bor kuch va imkoniyatimizni safarbar etamiz. Mamlakatimizda Korrupsiyaga qarshi kurashish sohasida qabul qilingan qonunchilik hujjatlari ijrosini taʼminlash maqsadida “Oʻzkomnazorat” Davlat inspeksiyasida: “Komplayens nazorat” tizimi joriy etilib, mazkur ishlarni muvofiqlashtiruvchi Korrupsiyaga qarshi ichki nazorat boʻlimi tashkil etildi; sohaga oid qator ichki normativ hujjatlar va tartib-qoidalar qabul qilindi va amaliyotga joriy etildi; korrupsiyaviy xavf-xatarlarni aniqlash, baholash va ularni kamaytirish boʻyicha chora-tadbirlar belgilandi; Korrupsiyaga qarshi kurashish ishlarini samaradorligini reyting baholash tizimi “E-Antikor” joriy etish yuzasidan 2022-2023-yillarga moʻljallangan Nazorat rejasi tasdiqlandi; Sohada vakolatli boʻlgan davlat organlari bilan hamkorlik yoʻlga qoʻyildi; Xodimlarning korrupsiyaga qarshi kurashish yoʻnalishida huquqiy ongi va huquqiy madaniyatini yuksaltirishga qaratilgan oʻquv kurslari tashkil etildi, ushbu illatga nisbatan murosasiz munosabatni shakllantirishga qaratilgan seminar va targʻibot tadbirlari muntazam oʻtkazib kelinmoqda. Korrupsiyaga qarshi yoʻlga qoʻyilgan tizimning asosiy vazifasi inspeksiyada korrupsiya holatlarining yuzaga kelish sabablari va shart-sharoitlarini aniqlash, ularni bartaraf etishning taʼsirchan choralarini ishlab chiqish, xodimlar oʻrtasida tushuntirish ishlarini olib borish, korrupsiya xavfi mavjud boʻlgan hollarda maslahat berish va qoʻllab-quvvatlashdan iborat. “Oʻzkomnazorat” Davlat inspeksiyasida korrupsiyaga qarshi qabul qilingan normativ hujjatlar, tartib-qoidalar, belgilangan vazifa va funksiyalarni toʻgʻri bajarilishi uchun asos boʻlib xizmat qilib kelmoqda. Oʻz navbatida, “Oʻzkomnazorat” Davlat inspeksiyasining har bir rahbar va xodimi oʻz funksional vazifalarini halollik, fidoiylik va sadoqat bilan bajarishi, lavozim vazifalarini xolisona va begʻaraz bajarishda unga salbiy taʼsir koʻrsatadigan yoki taʼsir koʻrsatishi mumkin boʻlgan shaxsiy manfaatdorlik holatlariga yoʻl qoʻymasligi, faoliyatning ochiqligi va shaffofligini taʼminlashi zarur. Fursatdan foydalanib, hamkasblarimiz, hamkorlarimiz va yurtdoshlarimizni korrupsiyaga qarshi talablarga ogʻishmay rioya qilishga, har qanday ehtimoliy qonunbuzarliklar haqida Davlat inspeksiyasining korrupsiyaga qarshi kurashish boʻyicha maxsus “ishonch telefoni”ga (71 202-20-19) xabar berishga va savollar bilan murojaat qilishga chorlaymiz. Biz roʻy berishi mumkin boʻlgan korrupsiyaviy holatlar, unga olib kelgan va olib kelishi mumkin boʻlgan har qanday harakat (harakatsizlik)lar haqida oʻz vaqtida maʼlumot olishdan manfaatdormiz. “Oʻzkomnazorat” Davlat inspeksiyasi korrupsiyaviy holatlar boʻyicha xabar bergan arizachilarga hamda taqdim etilgan maʼlumotlarga nisbatan maxfiylik tamoyillariga rioya etilishini kafolatlaydi. Korrupsiyaga qarshi kurashish barchamizning umumiy ishimiz va shiorimizga aylanishi lozim. Bu ishda barchani hamjihatlikka chaqiramiz.

Information on the execution of documents and assignments of the President of the Republic of Uzbekistan in the Inspection "Uzkomnozorat"